2026 жылғы 22 қазанда Теміртау қалалық тарихи-өлкетану музейінде Қазақстан Республикасы Күніне орай «Республика рухы» атты museumquiz форматында зияткерлік ойын өтті.
Зияткерлік сайыс төрт раундтан тұрды. Қатысушылар екі командаға бөлінді. Әрбір дұрыс жауап үшін бір ұпай берілді, ал ең көп ұпай жинаған команда жеңімпаз атанды.
Бірінші раунд – «Еліміздің көрікті жерлері». Қатысушылар Қазақстанның көрікті жерлерінің қандай бейнелері шынайы, ал қайсысы жасанды интеллект арқылы жасалғанын анықтауы керек еді. Раунд ойыншылардың зейінін және олардың еліміздің табиғи және мәдени мұрасы туралы білімдерін тексеруге мүмкіндік берді.
Екінші раунд – «Қазақстан картасын жина». Балалар Қазақстан облыстарына қатысты сұрақтарға жауап беріп, Қазақстан Республикасының картасын жинады. Тапсырма қатысушыларға өз елінің географиясы мен аймақтары туралы білімдерін нығайтуға көмектесті.
Үшінші раунд – «Мен кіммін?». Бұл раундта мектеп оқушылары музей жәдігерлері мен кеңестер арқылы танымал тұлғалардың тарихымен танысты. Ұсынылған заттардың ішінде сынақшы-ұшқыштың гермошлемі мен зымыран макеті, радиоқабылдағыш бірінші қазақстандық ғарышкер Тоқтар Әубәкіровтің есімімен байланыстырды; XIX ғасырдың картасы, Қашқарияға саяхат күнделігі, қол сағаты мен компас Шоқан Уәлихановтың өмірі мен зерттеулері туралы баяндайтынын білді; сондай-ақ Димаш Құдайбергеннің шығармашылығына байланысты домбыра, микрофон және басқа да заттар болды. Қатысушылар кімге қандай зат тиесілі екенін анықтауы керек еді.
Төртінші раунд – «Қара жәшік». Ең ерекше сынақ музей заттарын көзбен көрмей, қолмен ұстау арқылы болжау болды. Саңылаулары бар арнайы қорапта ұршық, асық, сағат, арифмометр және басқа да жәдігерлер болды. Ойыншылар кезек-кезек заттарды өздерінің сезімталдығына сүйене отырып анықтады. Зияткерлік ойын қорытындысы бойынша № 24 жалпы білім беретін мектептің атынан қатысқан «Қазақстан» командасы жеңіске жетті.
Museumquiz «Республика рухы» танымдық тапсырмаларды, командалық рухты және музей топтамаларымен танысуды қамтыған Қазақстан тарихы мен мәдениетіне қызықты саяхат болды. Ойын қатысушыларға туған елінің бай мұрасы мен ұлттық құндылықтарды сақтаудың маңыздылығын еске салды.
