2026 жылғы 16 қыркүйекте Теміртау тарихи-өлкетану музейінде оқушылардың қоршаған ортаға ұқыпты әрі жауапты көзқарасты қалыптастыруға бағытталған «Табиғатты қорғау және Қазақстанның қорық аймақтары» атты танымдық эко-тренинг өтті.

Іс-шара екі тақырыптық аймақта ұйымдастырылды. «Туған өлке табиғаты» залында балалар туған өлкенің жануарлар әлемімен танысып, жануарлар мен құстардың тұлыптарын тамашалады және іздеріне қарап жануарларды анықтайтын экологиялық зерттеуге қатысты.

Екінші «Қазақстанның қорық аймақтары» локациясында экологиялық зертхана ерекше қызығушылық тудырды. Оқушылар танымдық тәжірибелерге қатысып, қалдықтарды сұрыптауды үйренді. Балалар пластикті, металды және қағазды тиісті контейнерлерге дұрыс бөлуді үйреніп, ұтымды тұтынудың және қалдықтарға жауапкершілікпен қараудың қаншалықты маңызды екенін іс жүзінде түсінді.

«Аң аулау» ойыны да балалардың қызығушылығын тудырды. Оның барысында қатысушылар магнитті құрылғының көмегімен түрлі жануарлар мен құстардың бейнелерін «аулады». Алайда ойынның басты шарты – Қазақстанның Қызыл кітабына енгізілген жануарлар мен құстардың түрлерін шын мәнінде аулауға болмайтынын есте сақтау болды.

QR-кодтар арқылы ұйымдастырылған интерактивті тапсырмалар қатысушыларға құстар мен жануарлардың дауыстарын тыңдап, оларды дыбысы арқылы анықтауға мүмкіндік берді.

Эко-тренингке №10 мектептің 7-сынып оқушылары қатысты.